مسابقة اجمل طبق على الفيس بوك للاسبوع السابع

مسابقة اجمل طبق على الفيس بوك للاسبوع السابع

وفاز به كل من شيرى زهران عن طبق فراخ تكا وعيش بورى وتوميه الف مبروك شيرى
واميرة ام كرمه عن طبق محشى ورق عنب الف مبروك اميرة
وام يوسف القهوجى عن طبق فطيرة التفاح الف مبروك ام يوسف

اولا فراخ تكا مع خبز بورى وتوميه 

شيرى زهران

المقادير

المقادير
فرخة مقطعة اربع قطع ونشيل الجلد ومغسولة كويس ونعمل فيها فتحات

التتبيلة

4 فص توم
2 معلقة ك خل
2 م صغيرة بابريكا
2\1 معلقة كمون
2 معلقةكبيرة صلصة
1 م زنجبيل مطحون
1 م زعتر
2 معلقة زبادي
ملح + فلفل
نخلط التتبيلة في الخلاط وتضع علي الفرخة وتبات ليلة في التتبيلة في التلاجة ودة الاهم نضع الفراخ علي الشبكة

تدخل الفرن 220 ولازم الفرن يكون مسخن من قبل دخول الفراخ وتقعد ساعة في الفرن


العيش البوري

انا عملت كوب دقيق واحد بس وعمل 5 رغيف

المقادير

1 كوب دقيق
2\1 معلقة سكر
4\1 معلقة بيكنج بودر
ذرة ملح
ماء حسب العجن
يعجن كويس 10 دقائق ويقسم ويترك 2\1 ساعة
يفرد بالدقيق

نضع العيش وياخذ الزيت بالكبشة ويضع علي العيش من فوق وكل ماكان اسرع العيش يقب بسرعة


لعمل التومية
المقادير
2 ابيض بيض او بيضة كاملة
8 فص توم
4 معلق كبيرة خل
كوب زيت ذرة
ملح + فلفل

 

ثانيا طبق محشى ورق العنب

اميرة ام كرمه

 

المقادير

الخلطه:_ حوالي 2 او 3 كيلو طماطم وحوالي ب3 جنيه خضرة محشي واربع او خمس بصلات كبيره وخمس قرون فلفل حامي وحبة توم مدقوقين وملح وفلفل اسود وبهارات وكمون ونعناع ناشف وجنزبيل وطبعا نبدا بتقطيع الخضره صغير جدا ونغسلها كويس وبعدين نغسل الطماطم ونضربها في الخلاط مع الفلفل الحامي وشويه من التوم المدقوق وبعد ما نضربهم في الخلاط نقطع البصل في الحله ونحمره بشوية زيت وبحط معاهم شوية ليه من بتاعت اللحمه الضاني بتدي المحشي طعم يجنن ولما يبدا البصل يصفر نحط تلات ارباع الخضره ونقلب كويس ولما يختلطو جامد وريحة الخضره تبدا تظهر نحط الطماطم عليهم وباقي الخضره ونقلب كويس ونحط الملح والفلفل والكمون والبهارات والنعناع والجنزبيل وباقي التوم ونسيبه يتسبكو حوالي ساعه كده بس طبعا نقلبهم كل شويه عشان ما تلزئش في الحله وبعد ما تبرد انا بشيل اللي ححتاجه علي جنب والباقي بحطه في اكياس في الفريزر واطلعه لما احتاج وبعدين بحضر الرز اللي ححتاجه واغسله كويس ولصفيه من المياه واحطه فصينيه وعليه مقدار الخلطه اللي عملتها و3 معالق صلصه لاني بحب المحشي احمر اوي وبرضه بحط شوية توم عشان بحب طعم التوم في كل الاكل واقلب كويس واشوفه محتاج ملح تاني ولا لا واحطهم علي نار هاديه واقلب لحد ما الخلطه والرز يمسكو في بعض والطريقه دي ما تخليش الرز يعجن في قلب المحشي ولما تبرد شويه ابدا احشي ورقه ورقه وبالهنا والشفا وبحب احط عامحشي من فوق شوية صلصه قبل ما اسويه
وورق العنب طبعا تغسله كويس جدا ونشيل منه العروق ونخليها علي جنب عشان بنحطها في قعر الحله قبل التسويه وبعدين نغلي مياه وعليها شوية ملح وزيت زيتون ويا دوب نسقط الورق شويه ونشيله علطول ونصفيه ونحشي ونلف وبالهنا والشفا وانا بحط فوق عروق الورق عنب بصلايه وطماطمايه ومن فوق الوش لمون ونقطتين زيت زيتون وبعد مانرصه في الحله نغلي شوربه وعليها معلقتين صلصه ونغطي يادوب وشه ونحطه عالنار لحد مايغلي نوطي عليه ونحط الشياطه لحد ما يستوي وبالهنا

ثالثا طبق الحلو

فطيرة التفاح لام يوسف القهوجى

المقادير

 

 مقادير العجينة
2كوب دقيق
كوب زبدة
نصف كوب سكر بودر
بيضة
2معلقة ماء مثلج
مقادير الحشوة
تفاح مقطع مكعبات (بنكرمل معلقتين سكر ونحتة زبدة وبعدين بنضيف التفاح مع شوية قرفة وفانيليا ونسويه شوية ع النار) وممكن نضيف مكسرات وزبيب
طريقة الفطيرة او التارت
بنضرب السكر مع الزبدة وبعدين البيضة وبنضيف الدقيق ومعلقتين المية المثلجة ونلم العجينة بس مانعجنهاش نلفها فى كيس ونحطها فى التلاجة ترتاح تقريبا ساعة بعدين نطلعها ونفردها فى قالب التارت ونحط التفاح ونقطع باقى العجينة شرايط ونحطها بالشكل اللى فى الصورة وندخلها الفرن

 

 الف مبروك للفائزين 

مع تحيات الادمن سوزان مقاوى

 

Posted in:

Share